ព្រះសីហនុ៖ បុរសជាកម្មករសំណង់ម្នាក់ បានរអិលជើងធ្លាក់ពីកន្ត្រក បណ្តាលឱ្យទាក់នឹងខ្សែពួររឹត-ក បិះនឹងស្លាប់ខណៈកំពុងលាបថ្នាំអាគារការដ្ឋានមួយកន្លែង ប៉ុន្តែសំណាងល្អបានក្រុមការងារកម្មករសំណង់ជួយទាញចុះមកក្រោមទាន់ពេលវេលា។
ហេតុការណ៍នេះបានកើតឡើង នៅវេលាម៉ោង១និង២០នាទីរសៀលថ្ងៃទី៤ ខែមេសា ឆ្នាំ២០២៣ ត្រង់ចំណុចជាន់ទី១១ នៃអាគារការដ្ឋានកំពុងសាងសង់មួយកន្លែង ស្ថិតក្នុងភូមិ១ សង្កាត់លេខ៣ ក្រុងព្រះសីហនុ។
ក្រោយពេលកើតហេតុបុរសខាងលើត្រូវបានបញ្ជូនយកទៅសង្គ្រោះបន្ទាន់នៅមន្ទីរពេទ្យ ហើយបើតាមការបញ្ជាក់ពីកម្មករសំណង់ដូចគ្នា បានប្រាប់ថាបុរសខាងលើទំនងជាខ្យល់គរវិលមុខទើបរអិលធ្លាក់ពីកន្ត្រកបែបនេះ៕
